Aasmaani Shabd
Jab jhooth-mooth pathar hawa mein udte hain
Lehron se thodi door mujhe shabdon ke pathar mile.
Unhe besharmi se churakar,
maine pocket mein udhel diya.
Nokeele patharon ko chhantne ki koshish ki,
par kuch mujhe aur tumhein kharonch de hi gaye.
Ek syllable wale kankad bade patharon par gir-pad kar dab gaye.
Zindagi bhar sarsari nazrein unpe chhalang maarti rahin.
Thodi jaanch padtal ke baad dikha —
kuch pathar, bas pathar hone ka dhong kar rahe hain,
Apne jodidaar ki aad mein mujhe chakma de rahe hain.
Wo kahin ados-pados mein ghoomte-ghaamte dikh jaate hain,
Sankhya mein theek-thaak hain, chai-wai ke shaukeen bhi hain.
Par aakhir ye ghuspathiye Ados aur Ghaam hain kya?
Kya Thaak aur Wai ko lagta hai wo mujhe dikhte nahi?
Shayad inki ek khaasiyat thi,
jis wajah se inka “un-patharpan” main bardasht kar raha tha.
Ye jispe bhi chipakte, wo chattan ka tukda,
meri pocket se nikal kar, hawa mein tairne lagta.
“Kaam” pe jaana jeevan ka sabse bada bhaar tha.
Par jab foofaji ne poocha “kaam-dhaam kya karte ho?”
Toh achanak office jaana bas ek zaruri naatak jaisa laga.
Ek kirdaar mein insaan se zyada sehenshakti hoti hai,
Wo apna aadha din capitalism ko bhent chadha sakta hai.
Koi jhooth saamne aaye toh ek dost dost kho sakta hai.
Par jhooth-mooth ka pardafash toh ek
Scooby Doo ke episode jaisa hota hai.
Mere paas shayad koi na ho par aas-paas
koi na koi dikh hi jaata hai.
Saadharan pathar hazaron saal se
social contract mein dhal kar, thos ho gaye hain.
Par ye anti-gravity patharon ka janm kab aur kahan hua?
Ye toh bas prakat ho gaye, aur humari physics se pare,
dusre patharon ko aasmaan tak le gaye.
Waise hi jaise sapnon mein unchi buildingon se girne par hum udne lagte hain.